विवाहको वहाना गरी करणी तथा ठगी गर्ने पक्राउ

काठमाडौं । विवाह गर्छु भनि ललाई फकाई करणी गरी विभिन्न धनमाल समेत ठगी गरी फरार रहेका अभियुक्तलाई प्रहरीले पक्राउ गरेको छ । धादिङ सिद्धलेख गाउँपालिका ७ घर भएका ३० वर्षीय राजन बिश्वकर्मा भन्ने राजन सेन्चुरीलाई प्रहरीले पक्राउ गरेको हो ।

महानगरीय प्रहरी वृत थानकोटबाट खटिएको प्रहरीले काठमाडौं चन्द्रागिरी नगरपालिका ६ थानकोट चेकपोष्टबाट उनलाई पक्राउ गरेको हो । घटनाको अनुसन्धान गर्ने क्रममा राजनले महिलालाई केही महिना अगाडि फोन गरी आफ्नो नाम राजन श्रेष्ठ बताइ भेटघाट गर्न बोलाएको र भेटघाटमा आफू अविवाहित पुरुष भएको बताएका थिए ।

भेटघाटमा राजनले विवाह गर्न राखेको प्रस्ताव स्विकार गरी उनीहरुले प्रेम विवाह गरेर साउन १६ गते देखि २१ गतेसम्म थानकोट चेकपोष्टस्थित डेराकोठामा बसेको प्रारम्भिक अनुसन्धानमा खुल्न आएको हो ।

साथै साउन २२ गते राजनलाई कोठामा नदेखि खोजी गर्दा दराजमा राखेको नगद २ लाख रुपैयाँ, १ तोला बराबरको सुनको सिक्री, १ तोला बराबरको सुनको रिङ र १ थान मोवाइल राखेको स्थानमा नभएको तथा राजन सम्पर्क विहिन भएका थिए । राजन उपर मुलुकी अपराध संहिता, २०७४ बमोजिम करणी तथा ठगी कसूरमा थप अनुसन्धान भइरहेको महानगरीय प्रहरी वृत थानकोटले जनाएको छ ।