अग्रजका सपना साकार पार्ने बाटोमा महत्वपूर्ण काम भइरहेको प्रधानमन्त्रीको भनाई
काठमाडौं । प्रधानमन्त्री केपी शर्मा ओलीले अग्रजका सपना साकार पार्ने बाटोमा महत्वपूर्ण काम भइरहेको बताएका छन् । तुलसीलाल अमात्यको २३ औँ स्मृति दिवसका अवसरमा श्रद्धाञ्जलि व्यक्त गर्दै प्रधानमन्त्रीले देशलाई समृद्ध र नागरिकलाई सुखी बनाउन यतिबेला हामी एकताबद्ध भएर अघि बढ्नु अपरिहार्य रहेको उल्लेख गरेका हुन् ।
हामीले समृद्ध नेपाल–सुखी नेपालीको राष्ट्रिय आकांक्षा अगाडि सारेको उल्लेख गर्दै प्रधानमन्त्रीले पूँजी र प्रविधिको प्रयोग गरेर उत्पादन र निर्यात बढाउने तथा आयात घटाउने बाटोबाट समृद्धि हासिल हुने बताए । समानतालाई समृद्धिसँग जोडेर मुलुकमा परिवर्तन ल्याउन आफूहरु अग्रसर रहेको भन्दै जनताको जीवनमा समृद्धिसहितको समानता हासिल गरी अमात्यका योगदानलाई चिरस्मरणीय बनाउने पनि उनले बताएका छन् ।
अमात्य नेपालको पहिलो पुस्ताका कम्युनिष्ट नेता हुन् । १५ सेप्टेम्बर सन् १९४९ मा पार्टीका संस्थापक महासचिव पुष्पलालको नेतृत्वमा कम्युनिष्ट घोषणापत्र जारी गर्दा उनी पनि सहभागी थिए । विसं २००८ मा स्थापना भएको अखिल नेपाल किसान सङ्घको उनी संस्थापक अध्यक्ष थिए । विसं २००९ देखि २०१४ सम्म नेपालमा भएका ठूला किसान विद्रोहको नेतृत्व उनले गरेका थिए । विसं २०१५ मा भएको पहिलो संसदीय निर्वाचनमा उनले ललितपुरबाट नेपाल कम्युनिष्ट पार्टीको सांसद भई संसदीय दलको नेतृत्व गरेका थिए ।